كتبَ / حسين هاشم
الأربعاء 20 مارس 2013 3:02 مساءً
مع قرب بداية موسم الصيف واللي يعتبر اهم المواسم لعرض الافلام، بدأ عدد من المنتجين تحديد مواعيد عرض افلامهم الجديدة رغم الظروف الغير مستقرة في مصر الفترة دي.
فقرر المنتج أحمد السبكي -صاحب العدد الاكبر من الافلام الموسم ده - إنه يبدأ موسم الصيف بعرض فيلم "كلبي دليلي" في شهر أبريل الجاي وهو من بطولة سامح حسين واحمد زاهر ومي كساب وتأليف سيد السبكي ومن اخراج اسماعيل فاروق وهو فيلم كوميدي بتدور احداثه حوالين ظابط شرطة بيتم نقله من الصعيد لمارينا وبيقع في عدد من الاحداث والمواقف الكوميدية.
اما الفيلم التاني فهيكون فيلم "تتح" لمحمد سعد وحدد احمد السبكي يوم 6 مايو لعرض الفيلم في السينمات، وهو من بطولة محمد سعد ودوللي شاهين ومروي وهياتم والفنان سمير غانم ومن تأليف محمد نبوي وسامح سر الختم ومن اخراج سامح عبد العزيز.
وتم تحديد يوم 15 مايو لبدء عرض فيلم "الحرامي والعبيط" وهو من انتاج احمد السبكي برضه، والفيلم من بطولة خالد صالح وخالد الصاوي ومن تأليف احمد عبد الله ومن اخراج محمد مصطفي وبتدور احداثه حوالين شحات ورجل اعمال بتربطهم علاقة عجبية ببعض.
واعلن المنتج "محمد السبكي" بإنه هيعرض فيلم "سمير أبو النيل" اول شهر يونيو الجاي، والفيلم من بطولة احمد مكي ونيكول سابا وحسين الامام ومن تأليف ايمن بهجت قمر واخراج عمرو عرفة.
وفي نفس الوقت تم تأجيل عدد من الافلام اللي كان مفروض يتم عرضها في موسم الصيف زي فيلم "توم وجيمي" لهاني رمزي وتم تأجيله لموسم عيد الفطر، وتأجيل فيلم "قلب الأسد" لمحمد رمضان لنفس الموسم.
المصدر:او فن
المشاركات
ليست هناك تعليقات:
إرسال تعليق